DAI POMERISCHE INWANDRER

Ul Pomerland laig in Nordeuropa, an dai Ostsë, un bet dai hälwt fom 19te jårhuunerd wäir dat ain provins fon Prussie.

In dai tijd, sin dai gëgende wat hüüt tau Poland un Düütschland hööre, wirtschaftlig drel foirwärtskåme. Dai Industrial Revolution is fon Düütschland uunerstüt woore weegen dat wäir dai rijkst gëgend fon Europa in stainkål produktion, dai haupt energikwel fon dere tijd.

Dai industrialisation in Centraleuropa is ni in dai selwig tijd un uk ni in ale stele foirwärtskåme, weegen dår wäire gëgende soo as Pomerland woo dai landwirtschaft länger beståe hät mit eere feudal ordnung. Dai inwåners fon dës gëgend sin anlokt woore fon dai propagande fon dai kolonisationskompanis mit dai reer, dat sai nuu eer leewent forbeetre küüne: fon loonarbërers bij landhere küüne sai kåme tau eer aigen stük land. Uuterdem, foräänerte dai kompanisagents oft dai braife fon dai pomerer an eere früün mit hübsche wööre, dat sai dåran glööwte, dat man in Brasil air paradijsisch leewent mit melk un hoinig har.

Dai brasiliånisch regirung har sich forflichtet dai rës fon Hamburg bet Vitória im foiruut betåle. Dai stüün uk dårfoir in, dat jëre familg air stük land krëg taum aine waldslag måken fon twai duusend kwadratmëters taum planten un ain forluifig hüt taum wånen. Dai regirung gaiw de koloniste uk landgeschir, såd/köörn (mijlche, boone, potüfel, körnse), air pår swijn, twai hiner un aine hån.

Dai gaiwe nog ain mithülp taum eeten, wat månatlig betålt wür, söss månate lang. Up anerd kant müst dai kolonist dai rës, landgeschir un såd tröögbetåle in fair jåre. Åwer dat mëst wat sai forspraike, häwe sai ni hule, soo as dat landkrijgen. Dai pomerer, soo as dai andrer inwandrer fon Santa Leopoldina-Koloni, häwe eer stük land ni ümsüss kreege åwer sai häwe müst dat mit gild betåle. Dat land wäir uk as “prazo” (tijd) nent weegen dat har sijn tijd, dat dai schulden betålt müste ware, höögstens fair jåre wäir luurt. Wen dai kolonistefamilg dat gild ni tau tijd t’hooparbërt har, den naim dai kaiserregirung eer dat land werer weg. Soo fuune dai inwandrer anståt fom “forspråkene land” in Espírito Santo dai “höl up dai Ër”: ain faindlig gëgend, uutbrairende krankhëte, giftige tijre. Uuterdem, sin dai mëste daile wat dai regirung forspråke har, ni hule woore.

Dai airste pomerer sin in 1859 na Espírito Santo ankåme; dai mëste kaime åwer tüschen 1872 un 1873 an. Sai rëste fon Hamburg hawen af na Vitória, un dai rës duurte ungefäär soiwen weeke lang.

Dai krankhëte, dai wënig rentligkët, dai eetenknaphët un dai groot hit bröchte feel lüür taum dooren uunerweegens up dai groot së. Feel häwe eer kiner forspeelt weegen dai “sëkrankhët”, wënig drinkwåter, swak eeten un wënig rëgenhët in dai kåmern. Feel fruuges hare eer klaine im schif, un feel fon dere klainekiner häwe küünt ni lang leewe.

Soo sin feel inwandrer traurig, mit forlang nam haimat, mit gebrechlig gesundhët, åne kraft un åne muud in dat frisch land ankåme. Fon Vitória sin dai inwandrer na Boot in kanoos kåme, un in grooteschupen uunerbröcht. In dere hüüser wäir dat ni rentlig und angeneem taum wånen. Dai Koloni-krankedokters häwe eer öfter up dai gefår weese, dat dat up soo ain stel krankhëte uutbreeke küüne.

Fon Boot an günge dai koloniste na eer angeweesen stük land ruper. Dai kërls kaime tau faut hen un hoogte stijge doir de urwald up. Dai fruuges un kiner rëre up dai eesels. Dår wäire kain weegs un uk kain stijge taum doir de wald gåen un bet nam land ankåmen. Åwer mit feel arbëd häwe sai in dai gëgend ain wånstel upbuugt.

Im jårsål 1872 kaime dai airste pomerische familge nam municip Santa Maria de Jetibá, un in Jequitibá un Caramuru häwe sai dat uparbëren anfånge. Sowool in früüsche landpapijre as uk in dai landkårte, is dës gëgend bekand wääst as “Pomerland” urer “Hoog-Pomerland”.

Up eer land wäire dai koloniste flijtig beschäftigt mit dem urwald afhoogen un dem plantland trechtmåken. Dårmåls wäir dai moor, dat dai lüür ümer t’hoop upm juntament wäire, taum hüüserbuugen un swåre landarbëdmåken. Dai koloniste wäire mëst dai gans tijd mit dem landarbëd beschäftigt. Wen sai ni mit dai landwirtschaft beschäftigt wäire, den buugte sai tuune un maike landgeschir trecht; andrer däire sich körf, balaie tüüne urer sogår mööbels måke. Am anfang wäire dai kolonistefamilge ümer ainig, un dat wäir air gaur dail taum dai swårhëte doirmåken wat foir eer stüüne.

Dai pomerer daile eere arbëd in fruuges- un kërlsarbëd in. Air jërer hät sijne aparte arbëd. Dës schik is wichtig for dat kopshöögerkåmen fon dai familg un fon dai wirtschaft.

Dai swårhëte wat dai früüsche lüür doirset häwe, dai forlang fom haimatland, dai swårhëte fon dai airste tijd sin nog bet hüüt leewig in de pomerer eere gedanke. Dai håkerig taum dat stük land krijgen, dat frömd weerer un eeten, dai krankhëte – dat sin wek fon dai feele swårhëte wat dai inwandrer dår trufe häwe.

Wen sai wat taum inkööpen hare, den müste sai dere grootbarg ruunergåe (mit 700 bet 800 m hoog) bet am Boot, wat 65 m oiwer de meerspëgel ligt. Dår kaime sai nå 6 bet 8 stuun tau faut an doir aine stijg im urwald.

Den blëwe sai nacht im Boot un am ande dag günge sai barg ruper mit dem inkööpssak upm nake. Sai bröchte ni bloos mit wat sai for eer familge köft hare åwer uk sachen wat dai nåwers bestelt hare. Dat wäir wekmåls dai huusfruug wat dës rës maik, dat eer kërl de arbëd upm plantland ni anhule brüük.

Dai landwirtschaft is dai oiwerst geschäft fom municip Santa Maria de Jetibá. Dai koloniste wåne upm land woo dai arbëd mit dai gans familg dreewe wart; dai kolonis sin fon 20 bet 30 hektars afmeetert.

Früüer wäir dai landproduktion bloos taum aigene gebruuk for dai koloniste un soo is dat bleewe fon dai airste tijd bet ën fom 19te jårhuunerd. Boone un nåheer kafe wäire dai airste wåre wat forköft woore sin.

Åwer dat foirwärtskåmen fon dai gëgend hät mit dem gruinweesendsplanten anfånge, dai grötst innåm fon dai mëste koloniste.

Dai municip Santa Maria de Jetibá is fon Boot looswoore un hät anfånge doir dat gesets 4067 fon dai Assembleia Legislativa Estadual am 6te mai, un bekandmåkt woore doir de Diário Oficial do Estado am 10te mai 1988.

Dai municip besit air begeewen fon 736 km² braid, wat in dai höögt tüschen 400 un 1000 m oiwer dem meerspëgel ligt. Dai stad Sankt Mari ligt 712 m hoog un bliwt 80 km fon Vitória wijd. Dai municip is in twai distrikte indailt: Garrafão un dai sits. Hai is begrenst am nord fon dai municips Itarana un Santa Teresa; am süüd fon Domingos Martins; am west fon Afonso Cláudio; am ost fon Boot.

Prof. Dr. Ismael Tressmann